A magnífica beleza natural do Cantábrico de Foz
e as súas cristalinas augas, galardonadas anualmente coa Bandeira
Azul, converten á Perla da Mariña en centro de atracción
turística do norte de Galicia
Mondoñedo, sede do Bispado Bretoñés e Monumento
Nacional
San
Martiño de Mondoñedo foi fundación do Bispo de
Dume no séc.IX ao se refuxiar en Britonia do perigo musulmán
a súa nobreza e clero. Destruída a capital de Bretoña
polos normandos nas invasións de 966-971,
o rei Afonso III estableceu en Mondoñedo a nova sede sendo primeiro
bispo Sabarico. Mondoñedo foi capital ata 1112 da terra dos bretoñeses,
data na que se estableceu a sede definitiva en Valíbria,
e foron bispos seus San Rosendo, San Gonzalo "O
Bispo Santo" e Nuno Alonso, un dos autores da magnífica Historia
Compostelana.
Templo orixinario do séc.VI aínda que reedificado entre
os séc.X e XII, San Martiño de Mondoñedo é
a primeira catedral construída no sur de Europa, de planta
basilical de 3 naves con 3 ábsides na cabeza. Declarado Monumento
Nacional, son de grande interese artístico a xeométrica arte
céltica dos seus capiteis, as pinturas murais dos séc. XIV-XVI
e mais un románico retablo de pedra, única na arte europea,
que representa aos anxos-bispos das Sete Igrexas da Apocalipse.
O Museu Parroquial anexo á Catedral atesoura unha completa
colección da historia dun dos máis influintes Bispados do
Reino de Galicia. Entre as pezas exhibidas destacan as pertencentes a San
Gonzalo, O Bispo Santo, concretamente o seu sartego, báculo e anel
, xoia artística composta de catro cativos animais sostendo unha
pedra. Fóra da Catedral áchase a Fonte da Zapata,
de atribucións miragreiras xa que o manantial brotou por orde de
San Gonzalo.
Foz, Bandeira Azul
Terras
turísticas por excelencia, merecen visita os castros de Marzán,
Llás, Cangas e Fazouro, datado en máis de 2400 anos, perto
da praia de Arealonga. En Marzán achouse un torques considerado
como unha das máis perfectas xoias celtas, exhibido no Museu Provincial
de Lugo. Outros interesantes monumentos históricos son a igrexa
e retablo de Cangas, declarado de Mérito Artístico,
a igrexa de Cordido e os conxuntos arquitectónicos de Fazouro
e Nois.
Importante porto baleeiro e de asteleiros do Reino de Galicia, Foz foi
terra do Mariscal Pardo de Cela, que tiña
o seu Castelo da Frouxeira na parroquia de Santa Cecilia, outeando longas
vistas sobre o Valadouro. Magníficos
panoramas da ría enxérganse desde o Alto de Mañente
en Vilaronte, o Pico da Lebre, e o Pico da Corneria, lugar sacro dos antigos
cultos celto-druídicos.
Derradeiro tramo da Rasa Cantábrica que procedente de Francia
termina en Burela, Foz é moi reputado pola
variedade das súas espléndidas praias como as pequenas
de Sarrido, Fazouro e Lagoa, a recollida de Areoura, e a concorrida das
Polas. Lucen galardón de Bandeira Azul a urbana praia Rapadoira,
a da Pampillosa, a de Peizás e mais a longa e fina de Llás.
Perto da fermosa praia de Arealonga están o castro de Fazouro
e as belas enseadas das Insuas e A Ventoeira. Nos Castelos de San Pedro,
a costa rachada resiste a bravura das ondas, creando un escenario de salvaxe
emotividade.
Lecer e festa en Foz
Ben que a súa virxe liña costeira convida á practica
de deportes náuticos como o surf, windsurf, vela, piragüismo
ou pesca, celébranse en Foz eventos importantes como a popular Ruta
de Cicloturismo Pardo de Cela ou a Baixada ao Masma, competición
de piragüismo de categoría nacional.
Incomparable, definese así a gastronomía de Foz,
ao ser a súa especialidade toda a grande variedade dos mellores
productos do mar: lubrigante, centolo, nécora, camaróns,
berberechos, navallas, langosta... Organízanse sardiñadas,
bonitadas e mexiloadas populares durante o verán. Outras especialidades culinarias
de Foz son a Caldereta de Bispo, o Polbo á Feira, linguado á
prancha, salmonete, pescada, angula, pataca, e os deliciosos postres galegos
de filloas, orellas e queixos.
Populares celebracións son o Entroido de Foz, a Festa
do Carme coa procesión polas alfombras florais en xullo, e as festas
patronais de San Lourenzo en agosto, as mais concorridas da zona. Na capela
do Alto da Grela celébrase unha piadosa romaría en honra
ao Bispo Santo. San Gonzalo, bispo
de Britonia, afundiu en miragre a armada normanda que pretendía
saquear as terras de Britonia no séc.XI. Desde este sacro e panorámico
alto enxérgase toda a ría de Foz e a costa entre Tapia
e Burela.
Para saber máis sobre Foz:
Concello de Foz: Avenida irmáns López Real / tel. 982
140 221 |