No tempo das últimas invasions viquingas ao Reino de Galicia, unha grande frota normanda intentou penetrar nas terras bretoñesas aló polo séc.XI, apenas un século despois de teren os viquingos destruído a capital do Bispado de Britonia. Trasladada polo Rei Afonso III a nova capital desde a arrasada Bretoña ata Mondoñedo, era neste tempo Bispo de Britonia o ancián Gonzalo, home respeitado, querido e con sona de Santo. 

A alerta do avistamento da frota normanda chegou axiña a Mondoñedo, onde, perante o perigo inminente e dada a carencia de defensas necesarias para repeler tal ataque masivo, o Bispo Gonzalo decidiu evacuar a cidade e refuxiarse nas montañas na espera de reforzos. 

Así, o Bispo Gonzalo desaloxou a cidade e comezou a marcha cara ao interior, axuntándose ao numeroso grupo os habitantes de poboacións veciñas que tamén optaron por se refuxiar dun futuro incerto en mans dos viquingos. 

Ascendendo o Alto da Grela, os refuxiados empezaron a ver no Cantábrico a inmensa frota normanda que se achegaba rápidamente ás costas de Britonia. Nun momento piadoso, Gonzalo parou o paso e dispúxose a pregar polas almas dos seus, sendo imitado polos seus fregueses. 

Ao pouco de comezar o Bispo Santo as súas oracións, o ceo empezou a se encarapuchar, soprando o vento e levantando temporal no mar. O bon Gonzalo mantíñase pregando en tanto os abraiados fregueses ollaban como o temporal aumentaba de tal xeito que a frota viquinga empezaba a amosar dificultades para entrar na ría. 

As violentas ondas e o vento empezaron a afundir naves viquingas, que non podían chegar a terra nen escapar ao mar aberto. E o Bispo Gonzalo seguía pregando namentres lóstregos e xigantescas ondas ían naufragando toda a frota, barco tras barco, ata que nada quedou sobre o mar... 

O Bispo Santo logo abriu os ollos e, diante dos seus atónitos fregueses exclamou: 

- "Pidámoslle a Deus que nos permita sermos sempre libres e poidamos levar por toda a terra da Galiza esta ditosa nova!".
 

Desde entón, celébrase na capela do Bispo Santo do Alto da Grela unha moi popular romaría, recordo da miragre de Gonzalo. Outramente, no Museu da Catedral de Mondoñedo de Foz exhíbense o sartego, báculo e anel do Bispo bretoñés, e na próxima Fonte da Zapata a tradición atribúelle outra miragre a San Gonzalo.