Na parroquia de Ferreiravella medio centenar de ferreiros perduran
este antigo e tradicional oficio artesanal que goza de alta reputación
pola súa calidade en ferramentas de corte
O Val do Río Torto
Riotorto
é unha terra rural e sosegada. As súas prácidas paisaxes
convidan a panorámicas excursións polas serras do
Pousadoiro e Augaxosa ou polos vales dos ríos Orrea, Eo e Torto.
O bretoñés Monte Carracedo
enxerga un panorama de excepción do Cantábrico e o val do
Masma, abranguendo xeograficamente desde As Pontes ata os Ancares. No alto
do Carracedo, no que abondan as reses de gando en liberdade, loitárase
unha cruenta batalla contra as tropas napoleónicas no séc.XIX.
A artesanía de Ferreiravella
Terra da provincia de Mondoñedo
ata a súa desaparición en 1822, permanece na parroquia de
Ferreiravella unha prestixiosa tradición ferreira emparentada coa
de Pontenova, Taramundi
e Os Oscos. Coitelos, fouces e outras ferramentas
de corte dan sona a esta artesanía de incomparable calidade.
Entre os monumentos de Riotorto destacan a Capela de San Bernabé
e San Roque do séc.XI, en Espasante de Riba, e os artísticos
retablos das igrexas de Santa María e San Pedro en Meilán.
O segundo sábado de setembro celébrase na Muxueira a Feira
Anual de Augaxosa, de vocación tanto comercial como gastronómica-festiva.
Festas de grande popularidade son as patronais de San Pedro e
Santa Isabel, o 29 e 30 xuño nas Rodrigas. Dúas semanas máis
tarde, no segundo sábado de xullo, o mesmo lugar concentra unha
longa e devota fila de emigrantes, transportistas e conductores por mor
da bendizón dos seus vehículos na honra de San Cristovo.
Para saber máis de Riotorto:
Concello de Riotorto: As Rodrigas / tel. 982 346 222 |