|
Terras do sur de Britonia, Meira é unha verde e repousada
paraxe famosa por ser berce do río Miño e máis pola
monumentalidade e historia do seu cenobio cisterciense
O Mosteiro Cisterciense de Meira
Paraxes célticas e soedosas incitantes á meditacion e
ao retiro mundano, varios dos piadosos ermitáns destas terras bretoñesas
reuníronse no ano 995 fundando unha comunidade dedicada ao Salvador.
A pequena igrexa construída polo Abade Xiraldo tornaría en
1258 nun espléndido mosteiro consagrado polo Bispo de Lugo sendo
Eimerico o Abade do cenobio.
Obxecto de donacións e privilexios por parte da Realeza Galega
desde o séc.XII, o Mosteiro de Meira chegou a extender xurisdicción
desde Ortigueira e Ribadeo ata Os Peares. No
ano 1600 fundouse en Meira o Colexio de Filosofía, un avanzado
centro de estudos de grande sona no Reino de Galicia. Víctima das
guerras Napoleónica e Carlista así como da Exclaustración,
desapareceu no séc.XIX a comunidade relixiosa arruinándose
posteriormente o cenobio.
Do primitivo mosteiro, declarado Monumento Histórico-Artistico
en 1931, consérvase o claustro renacentista do séc.XVI e
a igrexa de Santa María, pertencente ao rómanico-borgoñés.
A curiosa igrexa de Santa María, fidel ás sobrias pautas
estilísticas de Fontenay e carente de influencias compostelanas,
consta dunha pranta de cruz latina con 3 naves no brazo maior, unha no
cruceiro, e 5 capelas na cabeceira, incluindo unha chirola ou sacristía
interior.
Irimia, berce do río Miño
Nas altitudes ondulantes da Serra de Meira, divisoria das cuncas
fluviais do Miño e do Eo, encóntrase o lugar de Corveceiras,
no nacemento do río Miño. No Pedregal de Irimia nace
o máis lonxevo e caudaloso dos ríos galegos, que percorre
diagonalmente Galicia ata deitar as súas augas no Atlántico,
observado polo Monte de Santa Trega.
 O
Pedregal de Irimia e a Serra de Meira ofrecen excursións con excelentes
panoramas das terras de Riotorto e A
Pontenova, e encóntrase tamén unha axeitada área
de lecer en Regolongo. Son célebres na comarca os eventos festivo-comerciais
da Feira de Meira, organizada xunto ao monumental mosteiro, e o
mercado gandeiro de Fonte dos Mouros. Outras festividades populares son
as Festas da Nosa Señora e San Roque, e máis a Festa da Malla,
ambas en Agosto.
Para saber máis sobre Meira:
Concello de Meira: praza do concello / tel.982 330 102 |
