A Estaca de Bares e o Cabo de Bares son as extremas septentrionais
do Reino de Galicia, esgrevia Paraxe Natural de incomparable e conmovedora
beleza
A Paraxe Natural da península de Bares
Atlántico
e Cantábrico únense na punta máis septentrional do
Reino de Galicia. A Serra da Coriscada, derradeira prolongación
da Cordal Galega, descende desde Muras ata a Península
de Bares ofrecendo un dos máis belos panoramas atlánticos
no Pico da Meda.
Landas senlleiras nas que natureza e vento reinan sobre o home, tanto
a magnificencia paisaxística como a súa localización
privilexiada motivaron que Bares fora declarado Zona Natural de Interese
Nacional e Zona Protexida.
O río Sor descende perto ao abeiro da Serra da Faladoira, formando
rápidos e saltos de grande esplendor ata fundir as súas inquedas
augas na ría do Barqueiro, entrante de escarpado litoral e brancos
areais compartidos co Vicedo. As serras da Coriscada e da Faladoira crean
particulares microclimas como o da parroquia de Ribeiras do Sor,
onde as benignas temperaturas permiten o medre da maior plantación
de camelias de Europa.
As terras máis occidentais dos bretóns de Galicia
No ano 916 o Bispado bretoñés de Mondoñedo
incluiu nos seus dominios o mosteiro, porto e terras do Señorío
de Mogor, fundación britónica que significa "castro".
Vestixios presentes dos antergos poboadores do Señorío de
Mogor son as mámoas e a necrópole galaica de Cancela da Coxa
de Arcos, perto do antigo porto celta da parroquia de Bares.
Do legado arquitectónico destas terras destaca o Pazo de San
Fiz, a Torre de Lama, e a medieval Ponte do Porto do Camiño Real
Viveiro-Ortigueira,
onde se encontra o marco do límite entre as provincias de Mondoñedo
e Betanzos. Ao pé do Parque Eólico de Bares consérvanse
os vellos muiños de vento e auga, típico exemplo da arquitectura
popular galega, tanto como as enxebres igrexas parroquiais de San Cristovo
das Ribeiras do Sor, Mañón, e Grañas do Sor.
Outros atractivos turísticos comprenden a impresionante Zona
Natural, o semáforo e máis o parque eólico de Bares,
as ruínas da Base Militar norteamericana e o conxunto arquitectónico
do porto do Barqueiro no Esteiro do Sor. Posuen un grande atractivo
natural os coutos de pesca de Segade, Ribeiras e Ulló, e as praias
de Igrexa Vella, Vilela e Esteiro, galardonada esta coa Bandeira Azul.
As festividades máis celebradas son as de San Pedro de Bares o 29
xuño, e a Virxe do Carme no 16 de xullo, con procesión marítima
polo Barqueiro.
Para saber máis de Mañón:
Concello de Mañón: praza do Mesón,1. O Barqueiro
/ tel. 981 414 002 |